ليش لما الريال يسمع كلام مرته يقولون عنه ( سكانه مرته ) ويضيفون وراها ( بااااع )
وبالمقابل المراة كله تسمع كلام ريلها ويحثونها على هـ الشي يقولونلها المراة مالها الا ريلها وسمعي كلامه !! معناته المراة بااع وسكناها ريلها ؟!!
يعني احنا عادي نكون خرفان عند الرياييل بس اهما لا ما يصير ؟!!
وتلوموني لي قلت بهاجر !!
لا وما يحرني الا اذا بنت قالت : ( الله لا اييب اليوم الي ريلي يسمع كلامي وياخذ فيه شوري ويصير بااع ) ؟!!
شوفو لي وين وصلت قامو البنات يغلطون على نفسهم وهما ما يدروون !! @@
صج لايعه جبدي مجتمع اى شي
ببباي
هناك 5 تعليقات:
ماألومك والله لو تهاجرين
وضع المراه مزري عندنا يالعرب
انا اكثر شيء يقهرني لما ترضى المراه بالمذله وتعتقد انه هذا هو وضعها الصحيح
أنا أقول لج حبيبتي
سمعي مو معنى كلامي ان المرأة مالها شخصية بس حتى بكتب علم النفس وغيرها يطلبون المرأة انها تكون مصدر مشورى للرجل يستشيرها ببعض الامور ياخذ رايها بشي معين اما موضوع يسمع كلامها وتقول له سو جذي ويسوي انتي بنفسج لو فكرتي تكونين انتي مكانه واهو مكانج بتقولين خل يصير اهو المرأة احسن ... لأن المرأة لها صفات ومميزات تختلف عن الرجل ..
اغلب الريايييل الي قطوا اهلهم بدور العجزة كان تنفيذ لاوامر امرأة ..
يقول لج وراء كل جريمة امرأة ههههه
وامير دولة ماشي على كلام مرته بيضيع شعب الديرة بسبتها ، اوكي حتى لو كانت المرأة طيبة وحكيمة ماتكون مصدر اوامر ، حتى لو شافت نفسها اهي الصح ماتقول له سو جذي تستشيره تبين له وجهة نظرها بس ما تأمره اذا انتي تشوفين هالشي عادي وحتى لو ريلج شاف هالشي عادي مع الايام راح يفكر وايد بهالموضوع وتلقينه يفكر ولا يقول وهالشي مو بمجتمعنا احنا بس حتى المجتمعات الاخرى دائما المرأة مصدر شجار اذا ولدها سمع كلامها ومشى على كلامها طلق مرته وكره مرته فيه انتي تخيلي ريلج يمشي على كلام امه بكل شي انتي راح تنتقدينه ، واذا مشى ورا كلمة زوجته هذا ماعتقد بيكون عنده شخصية انه يتخذ قراراته وراح يحس من داخله ان مرتي اهي الي ماسكة زمام الامور من نفسه راح يحس بضعف وانتي اوانا ندري تماما ان المرأة ماتحب ترتبط بريال ضعيف عدل؟؟ فكري فيها عدل
المرأة مصدر مشورى ورأي ونقاش لا قرارات واوامر
مبدعة
كلامج يختلف عن المضمون موضوع الذل الي تتعرض له المرأة شي ثاني بعييد جدا وله رد آخر وتصرفات تتبعها المرأة علشان تبتعد عن الي يذلها الله لا يقوله يختلف عن لمن المرأة تصدر أوامر وقرارات على ريلها ..
في سؤال جاوبي علية
لو رجل تزوج أربع نساء من ستقودة المرأه الأولى ولا الثانية ولا الثالثة ولا الرابعة ؟
ويقولون ليش العوانس والمطلقات بالكويت كثر
مو هالنوعية هذي هي اللي مكثرتهم
الله المستعان
طموحه انا اختلف معاج
انتي ذكرتي النماذج السيئه وتغاضيتي عن كل النساء الخيرات وياكثرهم
انا ما اقول ان الريال لازم ما يكون له راي ولازم يمشي ورا مرته
انا اقول كل انسان يكون له راي وكل انسان يحترم الثاني وما يقلل من شانه
والمفروض هالجمل السيئه ما يذكرها احد لان اذا شفتي الغلط من شخص ما يصير تعممين
بو عبد الملك جوابي عليك هو نفس الجواب على طموحه انا ما اطالب ان المراة تكون الامر الناهي انا اطالب بان كل شخص يكون له احترامه ويكون له رايه بدون استخفاف وتحقير من احد
مشكورين على تعليقاتكم
إرسال تعليق